اهم طرق للتغلب على الملل والاكتئاب

النهارده هنقول لك على 5 طرق بسيطة جدا للتغلب على الاكتئاب الموسمي ده إذا كنتِ واحدة من الناس اللي بتتأثر نفسيا بتغييرات الفصول..

1- الشمس

من أكتر الحاجات اللي بتساعد على رفع الروح المعنوية في فترة بداية الشتاء هي التعرّض المباشر لأشعة الشمس لوقت طويل، حاولي في الفترة دي تخرجي بالنهار، وتتمشي في مكان مفتوح أو في شارع تهويته كويسة والشمس منوراه، ده هيحسّن كتير من حالتك النفسية، وهيخلّي قلبك مرتاح ومزاجك أحسن.

2- الفيتامينات

الأنواع المختلفة من الفيتامينات هتساعدك كتير في الشعور بالطاقة والحيوية، والتغلب على مشاعر الكسل والتقل والإحباط اللي ممكن يكون بيضايقك في الفترة دي، وبيعطّلك عن واجباتك، حاولي تلتزمي ولو بكبسولة واحدة من الفيتامينات بعد ما تسألي الطبيب أو الصيدلي عن النوع المناسب.

3- التمارين الرياضية

جرّبي تشتركي في جيم ولو مرة واحدة في الأسبوع؛ لأن انتظامك على ممارسة التمرينات الرياضية من أكتر الحاجات اللي هتخليكي مليانة بالنشاط والإقبال على الحياة، وهتخلصك من مود الزهق والاكتئاب والمزاج الوحش، ولو كان صعب عليكِ تشتركي في جيم مناسب، ممكن تستبدليه بالمشي، يوم بعد يوم لمدة ساعة، وهتلاحظي إن نشاطك هيزيد، وطاقتك الإيجابية هتبقى أكبر.

4- الحياة الاجتماعية

ساعات كتير بيكون البرد سبب في إننا نقضي وقت أطول في البيت، ونكسل نخرج أو نقابل الناس، حاولي تكسري الحاجز ده جواكي، وانزلي وقابلي ناس، أو تطوعي في عمل خيري، أو نظّمي حفلة لأصدقائك، أو روحي رحلة، الحركة والحياة الاجتماعية ووجودك في وسط الأصدقاء المقربين مش هيخليكي تحسّي بالملل أو الرغبة في دخول الكهف زي ما بيحصل مع ناس كتير في بداية الشتاء.

5- الأكل الصحي

ناس كتير ماتعرفش إن الأكل ونوعه من الحاجات اللي بتأثر في درجة النشاط والحيوية، وفي الحالة النفسية والمزاجية، في الفترة دي حاولي يكون أكلك متوازن وصحي بقدر الإمكان، وابعدي عن الوجبات السريعة والجاهزة، وركّزي أكتر على الخضراوات والفاكهة، وعلى المشروبات الصحية والمنعشة والأعشاب الطبيعية، الأكل الصحي المتوازن مع ممارسة التمارين الرياضية ده هيخليكي حاسة دايما إن جسمك خفيف وفايق ومنتعش، وإنك تقدري تعملي أي حاجة، وعندك طاقة وحماسة طول الوقت.